Bæta við stöðu sína í Nox Health

Sjóður í rekstri Alfa Framtaks hefur bætt við hlut sinn í svefnrannsóknarfyrirtækinu Nox Health. Árni Jón Pálsson, fjárfestingastjóri hjá Alfa Framtak, segir fjárfestinguna undirstrika trú þeirra á starfsemi Nox Health.

Sjóður í rekstri Alfa Framtaks hefur bætt við stöðu sína í svefnrannsóknarfyrirtækinu Nox Health. Hlutirnir voru keyptir af öðrum hluthöfum og sá Kvika banki um sölu bréfanna fyrir hönd seljanda. Sjóðurinn eignaðist fyrst hluti í Nox Health haustið 2019 þegar félagið sótti sér nýtt hlutafé til frekari vaxtar.

Árni Jón Pálsson, fjárfestingastjóri hjá Alfa Framtak, segir trúnna á fyrirtækinu vera mikla. „Frá stofnun sjóðsins höfum við fjárfest í fjórum fyrirtækjum og er Nox Health það eina í eignasafni okkar sem er með meginstarfsemi sína fyrir utan Ísland. Fyrirtækið þróar og selur sérhæfðar svefnlausnir, starfar á stórum og ört vaxandi markaði og er að leysa mikilvægt vandamál, en um 20% fólks í heiminum glímir við svefnkvilla. Við hjá Alfa Framtak höfum mikla trú á félaginu og starfsmönnum þess og er þessi viðbótarfjárfesting merki um það.“

Nox Health varð til við samruna Nox Medical og bandaríska systurfélagi þess FusionHealth. Nox Health er leiðandi í framleiðslu á tækni og tækjabúnaði sem notaður er til greiningar á svefnröskunum. Búnaðurinn er notaður af læknum og heilbrigðisstarfsmönnum um allan heim og ætla má að 2,5 milljónir manna njóti árlega bættrar svefnheilsu þar sem lausnir Nox Health eru notaðar til greiningar á svefnvandamálum.

Nox Health er jafnframt meðal þátttakenda í Svefnbyltingunni – þverfaglegu og alþjóðlegu rannsókna- og þróunarverkefni, sem leitt er af Ernu Sif Arnardóttur, lektor við Háskólann í Reykjavík. Umrætt verkefni hefur fengið tveggja og hálfs milljarða króna, eða 15 milljón evra, styrk til fjögurra ára úr Horizon 2020 rammaáætlun ESB fyrir rannsóknir og nýsköpun.